Pathian Hmangaihna Famkim

Nikum khan tennis star, mi ṭhenkhatin tennis khawvela ropui ber anga an chhal hial Novak Djokovic an ama chanchin a ziahna Serve to Win (2013) ka chhiar a, a ngaihnawm ka tiin ka rilru a hneh em em mai a. Ama mimal chanchin te, an chhungkaw chanchin te, an ram Serbia-a indona avanga harsatna an tawh chi hrang hrang te a ziak a, chu'ng zawng aia ka rilru latu erawh chu infiammi a nih anga ei leh in (diet) leh taksa sawizawi (exercise) a ngaih pawimawh zia kha a ni. A diet a uluk avanga tun dinhmun thleng thei a nih thu a ziak a, chu chu ka rilruah hian a riak ve reng a, ka ei leh in uluk lehzual turin min cho hle a ni. Mi nawlpui chuan kan taksa tana ṭha leh ṭha lo hi engemaw chin chu kan hre deuh ṭhum awm e, hetiang a ni chung hian insum kan harsat tlan zia chu phat rual a ni lo. 

Keimah ngei pawhin ka thil ei duhzawngah te, ka in duhzawngah te ka duhthusama ka insum theih loh chu thuhran lo ni rih ta se, ka chhungte leh ka ṭhiante ka duhsak em em, ka hmangaih em em te ei leh in ka hlui ṭhin te ka ngaihtuah a, chuta ṭang chuan mihring hmangaihna famkim loh zia hi ka hmuchiang ta em em mai a. Chaw ei tura kan chhungte leh ṭhiante kan sawm ṭum a awm ṭhin a, kan phak tawka tuihnaihin chaw leh chawhmeh kan buatsaih a, kan hmangaih em em te ei atan an taksa mamawh aia tam chawhmeh mawm te, al te, thak te, thlum te kan siamsak ṭhin a. An tan a ṭha ber lem lo tih kan hriat loh vang a ni hauh lo, mahse nakin zela an hrisel zawk na tur ai chuan rei lo te chhunga an puar pui tur, tui an tih zawng eia, in tir kha kan thlang fo zawk a. An tana hrisel tur chin chauh lo hlui ni ta ila, chawhmeh a plain viau anga, an ei tui lovang tih kan hlau a, an ṭhatpui lem loh tur kha rei tak min dampui tura kan duh em em te kan chhawp ta ṭhin. Hei hi kan hmangaih loh vang leh an taksain tuar se kan tih vang a ni hauh lo, mihring atanga chhuak hmangaihna chuan a thlir zau tawk loh vang leh a famkim tawk loh vang a ni. 

Hetiang taka mihring hmangaihna a famkim loh avang hian Pathian hmangaihna famkim hi mihring tan hmuh fuh a, hriatthiam pawh a harsa em em ṭhin a lo ni a. Pathian chuan rei lo te nawmsakna leh hlimna ai chuan chatuan daih hlimna a dah pawimawh zawk a, chatuana nunna kan neih theih nan chuan khawvela kan tawrh te, kan nat te hi a phal em em mai a ni. Hei hi min hmangaih loh vang a ni loa, famkim taka min hmangaih zawk vang a lo ni. Hetiang taka ril leh thuk hmangaihna hi mihring tan chuan hriatthiam a har fo va, Pathian laka vui mai tepawh a awl. Kan hmuh fuh erawh chuan kan nun dan leh kan thil thlir dan thlak danglam dawrh thei thil a ni a, kan harsatna leh natna te lungawi loh pui mai lova, Pathian hnena lawmthu min hrilh tirtu a ni fo zawk thei.