Bible leh hnam dang nupui pasal neih

Bible-in hnam dang nupui pasal neih a phal lo ti kan awm a, a phal tho e ti kan awm bawk a. Thu inchuh mek a nih avangin ngaihtuah chian a ngai hle a ni. Theologian ka ni lova, Bible thu ka hriatthiam dan pawh a ril lo hle. Ka thuziakah hian pawmawm loh leh pawm tlak loh a awm anih chuan, ka thlirdan a famkim loh nachhan mumal taka min hrilh tur pawh ka mamawh hle mai. Engpawhnise, thupuiah lut tawh ila.

A hmasa berah chuan, Adam leh Evi thlahte vek kan ni a, Tirhkohte Thiltih 17:26 ah chuan Pathianin bul hmun khat vekin hnam tin a siam thu kan hmu a. He thu avang pawh hian inla hrang lutuk thei kan nilo tih ngaihdan awm thei a ni a, tin, Philippi buah khan ringtute chu “van khua leh tui” kan nih thu a inziak a. “Van khua leh tui” kan nihna kan pawm a nih chuan khawvela chi leh hnam lak vung lutuk vanga inthliarhrante, inhuatte hi ringtute tihtur a ni lo mai thei.

Pathianin Israel fate kha hnamdang nupui pasal neih a phal loh thu kan hre theuh awm e. Deuteronomy 7: 3 -4 ah chuan Hit-ho te, Girgas-ho te, Amor-ho te, Kanaan-ho te, Peirz-ho te, Hiv-ho te, Jebus-ho te chungchangah heti hian a inziak a,

*3 nupui pasalah in nei tur a ni hek lo … 4 In fapate, mi zui lai hi pathian dangte biakna lamah an hruai kawi mai ang a.*

(Exodus 34 : 10 -17 chhiar tel chuan he thu hi a chiang lehzual)
He thua thil chiang tak hmuh tur awm chu Pathianin Israel fate hnamdang nupui pasala neih a phal loh thu hi  a ni. A phal loh nachhan chu chang 4-naah a rawn lang leh nghal a, pathian dang an biak mai a hlauh vang  a ni. Pathianin hnamdang nupui pasala nei lo tura a duh chhan ber nia lang chu hnamdang an nih vang ngawr ngawr nilovin, Israel fate anga Pathian nung pakhat betute an nih loh vang ti ila kan sawisual tam awm lo ve. Heta Pathian rilru niawma lang hi 2 Korinth 6:14 ah a rawn lang leh a, Tirhkoh Paula chuan Korinth khaw mite chu ringlomite nen rual lo taka nghawngkawl bat dun lo turin a hrilh  a ni. Pathian nung betute tan ringlomi neih a rem lo tiin ngaihdan a siam theih awm e. (hemi chungchangah pawh hian ngaihdan dang a awm thin a, 1 Korinth 7:12 – 16 thu kan dawnsawn dan a inang vek lo)

Mosia chanchin kan hria a, Midian mi Zipori nupuiah a nei a, hnamdang nupuia a neih hnuah Pathianin a mite Aigupta ram ata hruai chhuak turin a ko a, hnamdang nupui nei a ni chungin chanvo pawimawh tak a pe. Tin, Mosia avang hian Zipori pa Jethroa pawhin Israel te Pathian chu pathian dang zawng zawng te aia a ropui zawk thu a puangchhuak hial a ni (Exodus 18 : 11). Tin, Numbers 12: 1 – 10 kan chhiar chuan, Miriami leh Arona ten Mosian Kus hmeichhia nupuia a neih avanga an sawichhiat thu a lang a, a chhiahhlawh Mosia an sawichhiat avangin an pahniha  a hrem thu kan hmu. Mosian hnamdang nupui  a neih avanga Pathianin a zilhhau emaw a hrem thu kan hmu lova, Mosia sawichhetute erawh a hrem thung.

Bible-a mi ropui kan hmuh Lal Davida te, Lal Solomona te pawhin hnamdang nupui an neih thu kan hmu a. Lal Davida leh a hnamdang nupui Bathsebi te karah lal ropui tak Solomona  a piang a, Pathianin nasa takin mal a sawm tih kan hre theuh awm e.

Tin, Bible-a hmeichhia kan ngaihsan zingah pawh hnamdang pasal nei langsar tak, Ruthi leh Lalnu Estheri te chanchin kan hria a, Pathian awmpuina an dawn zia pawh Bible-ah kan hmu. Juda nula Estheri chuan hnamdang lal ropui tak pasalah a nei a, lalnu  a nih hnuah amah kaltlangin Pathianin Juda mite ringlo mite lak atangin a chhanhim a ni.
Isua thlahtute zing ami Ruthi pawh Moab mi  a ni a, Israel mi pasalah a nei a, hnamdang nupui pasal an neih avanga Pathianin a hrem emaw, a zilh thu kan hmu lo.

Thlirna tihzauh belh turin hnamdang nupui nei Pathianin a hrem te chanchin han chhui leh thuak ila. Samsona khan Philistia hmeichhia Delili a ngaizawng a, hmel leh taksa mawina avanga a it hmeichhia hian Samsona, piantirh ata Pathian rawngbawl tura serhhran chu a tluktir ta a. Tin, kan lo ziahlan tawh Lal Davida pawhin Bathsebi a uire avangin Pathianin a hrem a, an fatir a tihhlum sak  a ni. Amaherawhchu hnamdang mi an neih vanga hrem tawk an nih thu erawh Bible-ah kan hmu lo. Lal Davida kha uirena sualah a tlu mai niloin, Bathsebi pasal Uria lakah rawng taka a chet avangin Pathianin a hrem  a ni. Samsona erawh chuan a rinna leh serhhran a nihna tawmpui lo mi nupuia a neih avangin a tuar ta a ni. Chutih rualin Israel mi hnamdang nupui nei Pathianin a awmpui tlat Mosia leh Boaza te kan en chuan, an nupuite khan an pasalte rinna an tawmpui tlat a ni.

Engpawhnise, heng kan han ziahlan takte hi hnamdang nupui pasala neih sawimawi tumna emaw, hetiang tura midang fuihna a ni lem lo.

Amaherawhchu, Bible tanchhana midang thil tisual leh Pathian duh lo dana nung anga puh hi thil namai  a ni lova, nghawng thui tak nei thei a ni. Bible kan tanchhan dawn anih chuan kan zirchian a, thlirdan hrang hrang awm thei kan ngaihtuah a pawimawh hle. Entirna hrang hrang kan pekah khian Israel fate leh hnamdang mi innei pawlh te kan hmu a, chhui theih chinah Pathianin a hrem dan leh mal a sawm dan kan hmu bawk a.

Ngaihdan dang nei te rilru thlak hi ka tum ber  a ni lova; ka duhthusam zawk chu ngaihtuahna zau zawk hmang chungin kan tanchhan Bible hi zirchiang ila tih hi  a ni. Chu chuan tawngkam mawi lo leh belhchian dawl lo tak taka inhnialna boruak atangin min kaichhuak anga, awmze nei zawkin he thu hi kan sawi ho thei dawn a ni.