Wednesday 4 September 2019

Harsatna Hmachhawn

Harsatna kan tih hian kan duhdan leh beisei dan nilova thil a thlen a, kan kal zelna tur leh hmalak tum dan tiharsa zawnga rokhawlhna kan tawh hi a kawk ber awm e. Harsatna tawk ngai lo mihring kan awm a rinawm loh a, harsatna kan tawh dan kawng erawh a inang lo ang. Harsatna kan tawh hian kan taksa, rilru leh thlarau a nghawng thin a; heng thil pathumte hi thil hran theuh ni mahse thuk taka inzawm vek an ni thung.  Taksa a hrisel loh chuan rilru leh thlarau nun thlengin a nghawng thei a, rilru lamah dam lohna a awm chuan taksa leh thlarau nun thlengin a nghawng thin a ni. Taksa hrisel lohna, sum leh pai mamawhna, mihring leh mihring inlaichinna kawnga buaina leh ruihhlo ngaihna te hi harsatna kan tawh chhan langsar zualte an ni. A tuartu thiam loh vang ni miah loa harsatna tawh chang awm bawk mahse, harsatna thenkhat hi chu mihringin kan insiam chawp tepawh niin a lang.


Harsatna hmachhawn tur chuan engkim paltlang thei turin mihring tinah theihna Pathianin a dah tih hriatchian phawt a tul awm e. He harsatna hi huaisen taka ka hmachhawn chuan ka hneh ngei ang tia mahni infuih reng chunga kan harsatnate sukiang tura theihtawp kan chhuah chuan, hneh theih loh nun nei kan nihzia kan hrechhuak fo ang. Harsatna kan hmachhawn dawn chuan harsatna kan tawh nachhan tak kan hriatchian a ngai a, chu chu sukiang tura hma lak dan tur ngun taka ngaihtuah chhunzawm a tul bawk a ni. Entirnan, leiba ngah lutuk vanga harsatna kan tawk a nih chuan, leiba kan ngah nachhan ngaihtuah hmasak a tul a, kan sum thawhchhuah mil loa pawisa kan hman vang a nih chuan kan nunphung thlak danglam tura rilru kan siam a tul dawn a ni. Kan hatsatnate mahni chauha hmachhawn theih loh chang a awm thei, chung hunah chuan midang thurawn lak hreh loh tepawh a tha a ni. Harsatna hrang hrang mitinin kan nei vek tih hre rengin, zah avang emaw, inthlahrun lutuk avanga mahnia tuar tlawk tlawk lovin midang hnena inphawrhruah te hian min chhawk zangkhai thei a ni tih hriat a tha awm e. A pawimawh berah chuan rilru nghet taka siam a, hawikir lova hmasawn tum rana hmalam pan tlat a tul a, kan tumna chu kan theihna chochhuaktu tha tak a ni dawn a ni.


Harsatna leh tawrhna phena malsawmna awm hmu thiamtute tluka nun duhawm nei an awm awm lo ve. Mahni inkhawngaihna leh vanduai bik intihna hian min hnuk hniam thin a ni tih hriain, malsawmna chhiar thiam tura rilru buatsaih hi a tha a ni. Vanduai intih chang a lo awm anih pawhin, kan chhehvela mite nun chik takin thlir ila, keini aia nasa zawk maha tuar tawh te leh tuar mek te an ni fo thin. Vanduai bik emaw intih hi malsawmna chhiar thiam loh vang a ni fo bawk. Harsatna kan tawhte hi min tichhetu niloin, min tichaktuah kan hman thiam a ngai a, kan hlawhtling a nih ngat chuan harsatna phena malsawmna chuan mi ropui zawkah min chher dawn a ni. Harsatna kan tawhte hi keimahni tan chauha malsawmna ni mai lovin, harsatna tawk ve te hrethiam chunga tanpuitu dinhmun ropui taka min hlangkai theitu a ni bawk awm e.


Nitini beiseina thar kan neih a pawimawh a, beiseina nei lo tan chuan hmasawn a har thin. Harsatna kan tawhte hneh tur chuan beiseina nung nen, hmalam thlir chung zelin ke kan pen a ngai a ni. Beiseina nung nei tur erawh chuan engkimtithei Pathian ropui tak kan hnenah a awm reng a ni tih hriat a ngai thung. Kan chhungte leh thiante ngei pawhin min kalsan ta nia kan hriat chang tepawh a awm thei, duh leh hmangaih taka min siamtu erawh kan kiangah a awm reng a,  a hnenah thinlung leh tih takzeta kan tlukluh hun a lo nghak reng a ni tih hre tharin, beiseina thar nen harsatna kan hmachhawn chuan min tichaktu Krista vangin hnehna kan chang ngei dawn  a ni.


Note : He article hi kan Branch KTP in Article Inziahsiak a huaihawt tuma ka ziah a ni a, thupui awmsa pali zingah he thupui hi ka thlang. 

No comments:

Post a Comment